Tuesday, July 23, 2024

ಮೋದಿ ಜೊತೆ ಹನುಮಂತನ ರೀತಿ ಇರುವೆ ಎಂದ ಮೋಸ್ಟ್ ಹಾಂಡ್‌ಸಮ್ ಎಂಪಿ ಚಿರಾಗ್ ಪಾಸ್ವಾನ್ ಯಾರು? ಕಂಗನಾ ಜೊತೆ ನಾಯಕನಾಗಿ ನಟಿಸಿದ್ದರು..!!

“ಪ್ರಧಾನಿ ನರೇಂದ್ರ ಮೋದಿ ಅವರ ಜೊತೆಗೆ ನಾನು ಹನುಮಂತನ ರೀತಿ ಇರುವೆ..”- ಈ ರೀತಿ ಫಿಲ್ಮೀ ಸ್ಟೈಲ್‌ನಲ್ಲಿ ಹೇಳಿಕೆ ನೀಡಿದವರು ಚಿರಾಗ್ ಪಾಸ್ವಾನ್‌. ಮೋಸ್ಟ್ ಹಾಂಡ್‌ಸಮ್‌ ಯಾರಪ್ಪಾ ಇವರು? ಅಂದವರು ಲಕ್ಷಾಂತರ ಮಂದಿ. ಅದರಲ್ಲೂ ಹುಡುಗಿಯರ ಕ್ರಶ್ ಆಗಿದ್ದಾರೆ. ಫಿಟ್ ಹಾಗೂ ಸ್ಟೈಲ್ ಆಗಿ ಕಾಣಿಸುವ ಚಿರಾಗ್ ಹಿನ್ನಲೆ ಏನೆಂದು ಹುಡುಕಾಡುತ್ತಿದ್ದಾರೆ.

ಹೌದು, ‘ಮೋದಿ 3.0’ ಸರ್ಕಾರದಲ್ಲಿ ಎಲ್‌ಜೆಪಿ (ಆರ್‌ವಿ) ನಾಯಕ ಚಿರಾಗ್ ಪಾಸ್ವಾನ್‌ ಮಹತ್ತರ ಪಾತ್ರ ವಹಿಸಿದ್ದಾರೆ. ಸದ್ಯ ಚಿರಾಗ್ ಹೆಸರು ಟ್ರೆಂಡಿಂಗ್‌ನಲ್ಲಿದೆ. ಅಂದಹಾಗೆ, ರಾಜಕೀಯಕ್ಕೆ ಕಾಲಿಡುವುದಕ್ಕೂ ಮುನ್ನ ಚಿರಾಗ್ ಪಾಸ್ವಾನ್‌ ಸಿನಿಮಾದಲ್ಲಿ ನಟಿಸಿದ್ದರು, ಅದು ಕೂಡ ಕಂಗನಾ ಎದುರು ಹೀರೋ ಆಗಿದ್ದರು ಎಂಬುದು ನಿಮಗೆ ಗೊತ್ತೇ? ಇಲ್ಲಿದೆ ಮಾಹಿತಿ

2011ರಲ್ಲಿ ಪ್ರದರ್ಶನ ಕಂಡ ‘ಮಿಲೇ ನಾ ಮಿಲೇ ಹಮ್’ ಅನ್ನುವ ಹಿಂದಿ ಸಿನಿಮಾದಲ್ಲಿ ಚಿರಾಗ್ ಪಾಸ್ವಾನ್‌ ಹೀರೋ ಆಗಿ ಕಾಣಿಸಿಕೊಂಡಿದ್ದರು. ಈ ಚಿತ್ರಕ್ಕೆ ನಾಯಕಿಯಾಗಿದ್ದವರು ಕಂಗನಾ ರಣಾವತ್. ಆದರೆ ಚಿತ್ರವು ಬಾಕ್ಸ್ ಆಫೀಸ್‌ನಲ್ಲಿ ನೆಲಕಚ್ಚಿತ್ತು. ಆದರೆ ಸ್ಟಾರ್‌ಡಸ್ಟ್‌ ನೀಡುವ ಸೂಪರ್ ಸ್ಟಾರ್ ಆಫ್ ಟುಮಾರೋ ಪ್ರಶಸ್ತಿಗೆ ಚಿರಾಗ್ ಪಾಸ್ವಾನ್‌ ಹೆಸರು ನಾಮನಿರ್ದೇಶನವಾಗಿದ್ದು ವಿಶೇಷ.

ಈಚೆಗೆ ನಟಿ ಕಂಗನಾ ರಣಾವತ್‌ ಚಿರಾಗ್ ಪಾಸ್ವಾನ್ ಒಟ್ಟಿಗೆ ಕಾಣಿಸಿಕೊಂಡ ಕ್ಷಣಗಳು ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗಿದ್ದವು. ಕಾಕತಾಳೀಯ ಎಂದರೆ, ಅಂದು ನಟಿ ಕಂಗನಾ ರಣಾವತ್ ಅವರ ಎದುರು ನಟಿಸಿದ್ದ ಚಿರಾಗ್ ಸಿನಿಮಾರಂಗಕ್ಕೆ ಹೊಸಬರಾಗಿದ್ದರು. ಆದರೆ ಇಂದು ರಾಜಕಾರಣದಲ್ಲಿ ಚಿರಾಗ್ ಪಾಸ್ವಾನ್ ಎದುರು ಕಂಗನಾ ಹೊಸಬರು. ಈಗ ಚಿರಾಗ್ ಮೂರನೇ ಬಾರಿಗೆ ಲೋಕಸಭಾ ಸದಸ್ಯರಾಗಿ ಸಂಸತ್ ಭವನ ಪ್ರವೇಶಿಸುತ್ತಿದ್ದಾರೆ.

ಮಿಲೇ ನಾ ಮಿಲೇ ಹಮ್’ ಸಿನಿಮಾದ ನಂತರ ಸಿನಿಮಾರಂಗಕ್ಕೆ ಚಿರಾಗ್ ಗುಡ್ ಬೈ ಹೇಳಿದರು. ತಂದೆ ರಾಮ್ ವಿಲಾಸ್ ಪಾಸ್ವಾನ್‌ ನೇತೃತ್ವದ ಲೋಕ ಜನಶಕ್ತಿ ಪಕ್ಷದಿಂದ ರಾಜಕೀಯಕ್ಕೆ ಧುಮುಕಿದ ಚಿರಾಗ್, 2014ರಲ್ಲಿ ಜಮುಯಿ ಲೋಕಸಭಾ ಕ್ಷೇತ್ರದಿಂದ ಚುನಾವಣೆಗೆ ಸ್ಪರ್ಧಿಸಿ, ಸಂಸದರಾದರು. 2019ರಲ್ಲೂ ಸಂಸದರಾಗಿ ಪುನರಾಯ್ಕೆಯಾದರು ಚಿರಾಗ್. ಆದರೆ 2021ರಲ್ಲಿ ಎಲ್‌ಜೆಪಿ ವಿಭಜನೆ ಆಯಿತು. ಲೋಕ ಜನಶಕ್ತಿ ಪಕ್ಷ (ರಾಮ್ ವಿಲಾಸ್‌) ಎಂಬ ಹೊಸ ಪಕ್ಷದ ಮೂಲಕ ಎನ್‌ಡಿಎ ಮೈತ್ರಿಯೊಂದಿಗೆ 2024ರ ಲೋಕಸಭಾ ಚುನಾವಣೆಯನ್ನು ಚಿರಾಗ್ ಎದುರಿಸಿದ್ದರು.

ಈ ಬಾರಿ ಐದು ಕ್ಷೇತ್ರಗಳಲ್ಲಿ ಲೋಕ ಜನಶಕ್ತಿ ಪಕ್ಷ (ರಾಮ್ ವಿಲಾಸ್‌) ಅಭ್ಯರ್ಥಿಗಳು ಅಖಾಡಕ್ಕೆ ಇಳಿದಿದ್ದರು. ಐದರಲ್ಲೂ ಗೆಲುವು ಕಂಡಿದ್ದಾರೆ. ಈ ಬಾರಿ ಜಮುಯಿ ಲೋಕಸಭಾ ಕ್ಷೇತ್ರವನ್ನು ಸಂಬಂಧಿ ಅರುಣ್ ಭಾರತಿಗೆ ಬಿಟ್ಟುಕೊಟ್ಟ ಚಿರಾಗ್, ತಮ್ಮ ತಂದೆ ಪ್ರತಿನಿಧಿಸುತ್ತಿದ್ದ ಹಾಜಿಪುರ ಲೋಕಸಭಾ ಕ್ಷೇತ್ರದಿಂದ ಚುನಾವಣೆ ಎದುರಿಸಿದ್ದರು. ಚುನಾವಣೆಯಲ್ಲಿ ಭರ್ಜರಿ ಗೆಲುವು ಪಡೆದಿರುವ ಚಿರಾಗ್, ಎನ್‌ಡಿಎ ಸರ್ಕಾರದಲ್ಲಿ ಕೇಂದ್ರ ಸಚಿವ ಆಗಿ ಪ್ರಮಾಣ ವಚನ‌ ಸ್ವೀಕರಿಸಿದ್ದಾರೆ.‌

Related Articles

Latest Articles