ಶಿಕ್ಷಕಿಯೊಬ್ಬಳು ಎಂಟು ವರ್ಷಗಳಿಂದ ವಿದೇಶದಲ್ಲಿದ್ದರೂ ಬಿಟ್ಟಿಯಾಗಿ ಸರ್ಕಾರಿ ಸಂಬಳ ಎಣಿಸಿದ ವಿಚಿತ್ರ ವರದಿ ಸುದ್ದಿಯಾಗಿದೆ. ಚಿಕಾಗೋದಲ್ಲಿ ಕುಳಿತುಕೊಂಡೆ ಬರೋಬ್ಬರಿ 8 ವರ್ಷದಿಂದ ಸಂಬಳವನ್ನು ಎಣಿಸಿಕೊಂಡಿದ್ದು ಗ್ರಾಮಸ್ಥರ ಆಕ್ರೋಶಕ್ಕೆ ಕಾರಣವಾಗಿದೆ.
ಗುಜರಾತ್ನ ಬನಸ್ಕಾಂತಾ ಎಂಬ ಹಳ್ಳಿಯಲ್ಲಿ ಪಂಚ ಪ್ರಾಥಮಿಕ ಶಾಲೆಯಲ್ಲಿ ಹೆಡ್ಮಿಸ್ ಆಗಿದ್ದ ಭಾವನಾ ಪಟೇಲ್ ಅನ್ನುವವರು ಕಳೆದ ಎಂಟು ವರ್ಷದಿಂದ ಚಿಕಾಗೋದಲ್ಲಿ ವಾಸವಿದ್ದಾರೆ. ಆದರೂ ಕೂಡ ರಾಜ್ಯ ಸರ್ಕಾರದಿಂದ ಅವರಿಗೆ ಈ ಎಂಟು ವರ್ಷದಿಂದ ತಿಂಗಳು ತಿಂಗಳು ತಪ್ಪದೇ ಸಂಬಳ ಹೋಗಿದೆ. ಇದರ ವಿರುದ್ಧ ಸದ್ಯ ಸ್ಥಳೀಯರು ಸಿಡಿದೆದ್ದಿದ್ದಾರೆ. ಗ್ರಾಮದ ಕೆಲವು ವಿದ್ಯಾರ್ಥಿಗಳು ಇದನ್ನು ಕಂಡುಹಿಡಿದು ಇದರ ಬಗ್ಗೆ ವಿಚಾರ ಮಾಡಿದಾಗ ಕಳೆದ 8 ವರ್ಷಗಳಿಂದ ಭಾವನಾ ಪಟೇಲ್ ಅನ್ನುವವರಿಗೆ ಸರ್ಕಾರಿ ಸಂಬಳ ಬಿಟ್ಟಿಯಾಗಿ ಹೋಗುತ್ತಿರುವುದು ತಿಳಿದು ಬಂದಿದೆ.
ಸ್ಥಳೀಯರು ಹೇಳುವ ಪ್ರಕಾರ ಭಾವನಾ ಪಟೇಲ್ ದೀಪಾವಳಿಗೊಮ್ಮೆ ಮಾತ್ರ ಈ ಊರಿಗೆ ಬಂದು ಶಾಲೆಗೆ ಭೇಟಿಕೊಟ್ಟು ಹೋಗುತ್ತಾರೆ. ಆ ವೇಳೆ ಯಾವುದೇ ವಿದ್ಯಾರ್ಥಿಗಳು ಕೂಡ ಶಾಲೆಯಲ್ಲಿ ಇರುವುದಿಲ್ಲ, ಆ ಸಮಯದಲ್ಲಿ ಬಂದು ಹೋಗುವ ಇವರು ಮತ್ತೆ ಈ ಕಡೆ ಮುಖ ಮಾಡುವುದಿಲ್ಲ ಅವರಿಗೆ ಹೇಗೆ ಎಂಟು ವರ್ಷದಿಂದ ಸಂಬಳ ಹೋಗುತ್ತಿದೆ ಅಂತ ಆಕ್ರೋಶ ಹೊರಹಾಕಿದ್ದಾರೆ. ಸದ್ಯ ಬಂದ ಮಾಹಿತಿಯ ಪ್ರಕಾರ 2013ರಲ್ಲಿಯೇ ಭಾವನಾ ಪಟೇಲ್ ಚಿಕಾಗೋಗೆ ಹೋಗಿದ್ದಾರೆ. ಅಲ್ಲಿನ ಗ್ರೀನ್ ಕಾರ್ಡ್ ಕೂಡ ಹೊಂದಿದ್ದಾರೆ, ಆದ್ರೂ ಕೂಡ ಇಲ್ಲಿನ ಬಿಟ್ಟಿ ಸಂಬಳವನ್ನಂತು ತಿನ್ನುವುದು ಬಿಟ್ಟಿಲ್ಲ.
ಸದ್ಯ ಶಾಲೆಯ ಇನ್ ಚಾರ್ಜ್ ಪ್ರಿನ್ಸಿಪಾಲ್ ಆಗಿರುವಂತಹ ಪಾರುಲ್ ಮೆಹ್ತಾ ಈ ವಿಷಯವನ್ನು ಶಿಕ್ಷಣ ಇಲಾಖೆಯ ಅಧಿಕಾರಿಗಳ ಗಮನಕ್ಕೆ ತಂದಿದ್ದು ಸದ್ಯದಲ್ಲಿಯೇ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು ಎಂದು ಹೇಳಿದ್ದಾರೆ.